خوفك ..

ضهرك هينحنى من وقفه الشباك
مع انى حذرتك
و شرحتلك بميت طريقه
دى مش وقفه المنتظر
دى وقفه الخايف و خوفك انت تحديدا سخيف
بارد
مالوش ريحه
خوفك جبان زيك
اجبن من انه يعلن عن نفسه بصراحه
اضعف من المشي وحده
فى الشارع الفاضى
خوفك ما قدرش غير عليك
اتغذى على كل احساسيك
و قعد لوحده متربع فى قلبك
و انت
باين عليك مرتاح كده
لدرجه انك نسيت مكان الباب
واقف ورا الشباك كأنك شبح
كأنك خيال مبقاش يخوف حد
[ محمد خير ]